ខេត្តកណ្ដាល ៖ ប្រភពព័ត៌មានទើបបង្ហើបឱ្យដឹងនៅថ្ងៃទី០៦ ខែមករា ឆ្នាំ២០១៨ នេះថា ជនត្រូវចោទម្នាក់ពាក់ព័ន្ធករណីជួញដូរគ្រឿងញៀន ដោះខ្នោះដៃដោយខ្លួនឯងរត់គេចខ្លួនពីតុលាការខេត្តកណ្តាល ដែលបញ្ហានេះ មជ្ឈដ្ឋានជាច្រើនរិះគន់យ៉ាងខ្លាំងក្លា អំពីការធ្វេសប្រហែលរបស់នគរបាលការិយាល័យប្រឆាំងការជួញដូរគ្រឿងញៀន នៃស្នងការដ្ឋាននគរបាលខេត្តកណ្តាល ។
ជនសង្ស័យពីរនាក់ប្តីប្រពន្ធពាក់ព័ន្ធករណីជួញដូរគ្រឿងញៀន ត្រូវបាននគរបាលការិយាល័យប្រឆាំងការជួញដូរគ្រឿងញៀន នៃស្នងការដ្ឋាននគរបាលខេត្តកណ្តាល បញ្ជូនមកអយ្យការអមសាលាដំបូងខេត្តកណ្តាល កាលពីថ្ងៃទី៣១ ខែធ្នូ ឆ្នាំ២០១៧ ដើម្បីចាត់ការតាមច្បាប់ ។
នគរបាលទាំងនោះស្លៀកពាក់ឯកសណ្ឋានស៊ីវិល ដោយទំនងសំអាងថាជាថ្ងៃអាទិត្យ ។ ក្រោយការសាកសួរ ព្រះរាជអាជ្ញារងសម្រេចចោទប្រកាន់ពីរនាក់ប្តីប្រពន្ធនេះ ពីបទជួញដូរដោយខុសច្បាប់នូវសារធាតុញៀន រួចបញ្ជូនជនត្រូវចោទ និងសំណុំរឿងទៅចៅក្រមស៊ើបសួរចាត់ការបន្តតាមនីតិវិធី ។
ចៅក្រមស៊ើបសួរសម្រេចចេញដីកាឃុំខ្លួនជនត្រូវចោទទាំងពីរនាក់នេះ ដាក់ពន្ធនាគារបណ្តោះអាសន្ន ។ ចន្លោះពេលនេះ ជនត្រូវចោទទាំងពីរនាក់ត្រូវជាប់ខ្នោះដៃជាមួយគ្នា ហើយដោយសារការធ្វេសប្រហែលរបស់នគរបាល ប្តីបានដោះខ្នោះដៃរត់គេចខ្លួនតែម្នាក់ឯងចោលប្រពន្ធឱ្យនៅតែឯង ធ្វើឱ្យមានការភ្ញាក់ផ្អើលតែម្តង ។
ប៉ុន្តែដោយសារថ្ងៃរត់គេចខ្លួននោះជាថ្ងៃអាទិត្យ ទើបព័ត៌មានទើបបង្ហើបឱ្យដឹងនៅថ្ងៃនេះ ។ ពាក់ព័ន្ធករណីនេះ លោកឧត្តមសេនីយ៍ត្រី ឈឿន សុចិត្រ ស្នងការរងនគរបាលខេត្តកណ្តាល ទទួលផែនគ្រឿងញៀន ពុំទាន់អាចសុំការបញ្ជាក់បានទេ ដោយសារទូរស័ព្ទចូលហើយនិយាយស្តាប់គ្នាមិនបានរួចចុចបិទទូរស័ព្ទវិញ ។
មន្ត្រីតុលាការបង្ហើបឱ្យដឹងថា ករណីនេះ តុលាការចេញដីកាបង្គាប់ឱ្យចាប់ខ្លួនជនត្រូវចោទរូបនេះត្រលប់មកវិញហើយ ។ ទាំងអត្តសញ្ញាណជនត្រូវចោទ និងប្រវត្តិនៃរឿងក្តី ត្រូវបានប្រភពព័ត៌មានជាច្រើនលាក់លៀម ពោលគឺពុំបង្ហើបឱ្យដឹងនោះទេ ៕
ចែករំលែកព័តមាននេះ