ខេត្តមណ្ឌលគិរី ៖
អាជ្ញាធរបានរាយការណ៍ថា យ៉ាងហោចណាស់មានមនុស្សប្រុសស្រីក្មេងចាស់ ចំនួន៨០នាក់ រស់នៅឃុំស្រែឈូក ត្រូវបានបញ្ជូនទៅសង្គ្រោះបន្ទាន់នៅតាមមន្ទីរពេទ្យនានាក្នុងស្រុកស្នូល ខេត្តក្រចេះ តាំងពីល្ងាចថ្ងៃទី៩ ខែឧសភា រហូតដល់រសៀលថ្ងៃទី១០ ឧសភា ២០១៨ ក្រោយពួកគាត់មានអាការៈ ក្អួតចង្អោ រាគ វិលមុខ នឹងអស់កម្លាំង ដែលសង្ស័យបណ្តាលមកពីពុលសារធាតុគីមីក្នុងទឹក ។
លោក ស៊ុន ប៊ុនធឿន អធិការនគរបាលស្រុកកែវសីមាបានឲ្យដឹងថា នៅវេលាម៉ោងប្រមាណ៩ព្រឹកថ្ងៃទី៩ ឧសភា លោកទទួលបានព័ត៌មានពីនាយប៉ុស្តិ៍រដ្ឋបាលស្រែឈូកថា មានអ្នកភូមិចំនួន១៤នាក់រងនូវអាការៈពុលថ្នាំ ។ លោកអធិការបន្តថា បន្ទាប់ពីដឹងព័ត៌មាននេះភ្លាមលោក បានចុះទៅពិនិត្យទីតាំងកើតហេតុដោយផ្ទាល់ និងបាននាំយកអ្នកជំងឺទៅសម្រាកព្យាបាលនៅមន្ទីរពេទ្យបង្អែកស្រុកស្នូល ខេត្តក្រចេះ ដែលនៅកៀកនឹងភូមិកើតហេតុ ។
លោក ស៊ុន ប៊ុនធឿន បានឲ្យដឹងទៀតថា ចំនួនអ្នករងគ្រោះដោយមានអាការៈ ក្អួតចង្អោ រាគ វិលមុខ នឹងអស់កម្លាំងបានបន្តកើនឡើង រហូតដល់៣៤នាក់ គិតត្រឹមវេលាម៉ោង៩ព្រឹកថ្ងៃទី១០ ឧសភា ។ ទោះជាយ៉ាងណាប្រជាពលរដ្ឋមួយចំនួនបានធូរស្រាលវិញ ក្រោយទទួលបានការព្យាបាលពីសំណាក់គ្រូពេទ្យនឹងបានវិលទៅផ្ទះខ្លះៗផងដែរ ។
ចំពោះសភាពការណ៍ជាក់ស្តែងក្នុងឃុំស្រែព្រះ តាមការឲ្យដឹងពីលោក នួន សារ៉ន អភិបាលស្រុកកែវសីមាថា គិតត្រឹមវេលាម៉ោង១ រសៀល ថ្ងៃទី១០ ឧសភា ស្ថានភាពអ្នកជំងឺដែលមិនទាន់ដឹងបណ្តាលមកពីមូលហេតុអ្វីនោះ បានបន្តកើនឡើងយ៉ាងគំហុកពី៣៤នាក់ ទៅ៨០នាក់ ដែលតម្រូវឲ្យក្រុមគ្រូពេទ្យត្រូវយករថយន្តសង្គ្រោះបីគ្រឿង នឹងរថយន្តរបស់អ្នកភូមិជាច្រើនគ្រឿងទៀត ដើម្បីដឹកអ្នកជំងឺទៅមន្ទីរពេទ្យដើម្បីសង្គ្រោះ ។
ទោះជាយ៉ាងណាត្រឹមម៉ោង៣រសៀលថ្ងៃទី១០ ឧសភា គេនៅមិនទាន់ទទួលបានការបញ្ជាក់ពីអាជ្ញាធរ ពិសេសមន្ទីរសុខាភិបាលខេត្តមណ្ឌលគិរីនៅឡើយ ពីមូលហេតុដែរបណ្តាលឲ្យអ្នកភូមិជិត១០០នាក់ រងនូវអាការៈជំងឺដូចៗគ្នាខាងលើនេះ ។
បើតាមក្រុមគ្រូពេទ្យនៃមន្ទីរសុខាភិបាលបានបញ្ជាក់ថា ក្រោយសាកសួរជនរងគ្រោះ ពួកគាត់ប្រាប់ស្រដៀងគ្នាថា មុនកើតហេតុ គឺពួកគាត់បានបរិភោគទឹក ដែលមានខ្លះជាទឹកអណ្តូង នឹងទឹកអូរ ។
តែគេនៅមិនទាន់អាចសន្និដ្ឋានថា ជាករណីពុលទឹកនោះទេត្រូវរង់ចាំលទ្ឋផលវិភាគរបស់ក្រុមអ្នកជំនាញសិន ។
បើតាមប្រភពនានាបាននិយាយថា ករណីខាងលើអាចបណ្តាលមកពីកង្វះអនាម័យរបស់អ្នកភូមិ ហូបទឹកឆៅ ឬទឹកដែលមានប្រភពមិនច្បាស់លាស់ ។ ហើយរដូវនេះជារដូវភ្លៀង មានការដាំដុះដំណាំនឹងការប្រើប្រាស់នូវប្រភេទថ្នាំគីមីគ្រប់ប្រភេទ ដើម្បីការពារសត្វល្អិត ឬថ្នាំបង្កើនជីវជាតិ នឹងថ្នាំកម្ចាត់ស្មៅជាដើម ដែលផលិតផលទាំងនេះសុទ្ឋសឹងមានលាយសាធាតុគីមីក្នុងកម្រិតខ្ពស់។
យ៉ាងណាក៏ដោយការលើកឡើងបែបនេះ គ្រាន់ជាការសន្និដ្ឋានក្រៅផ្លូវការមួយប៉ុណ្ណោះ មិនអាចត្រឹមត្រូវនោះទេ មានតែរង់ចាំសមត្ថកិច្ច នឹងមន្ត្រីជំនាញ ស្រាវជ្រាវនឹងស៊ើបអង្កេតជាក់ស្តែង ទើបដឹងការពិត ។
លោកស្វាយ សំអ៊ាង អភិបាលខេត្តមណ្ឌលគិរីនៅល្ងាចថ្ងៃទី១០ បានដឹកនាំក្រុមគ្រូពេទ្យបន្ថែមចុះទៅតំបន់កើតហេតុ ដើម្បីពិនិត្យនឹងជួយសង្គ្រោះដល់អ្នកភូមិដែលកំពុងជួបបញ្ហាសុខភាព ។
សូមបញ្ជាក់ថា តំបន់ឃុំស្រែឈូក ស្រុកកែវសីមា ដែលកំពុងផ្ទុះនូវស្ថានភាពជំងឺគ្មានមូលហេតុខាងលើនេះ មានចម្ងាយពីទីរួមខេត្តមណ្ឌលគិរីប្រមាណ១៦០គីឡូម៉ែត្រ ស្ថិតក្នុងដែនជម្រកការពារសត្វព្រៃកែវសីមា ដោយត្រូវធ្វើដំណើរវាងតាមផ្លូវស្រុកស្នូល ខេត្តក្រចេះ ទើបអាចចូលទៅដល់ឃុំស្រែឈូក ហើយនៅរដូវវស្សាបែបនេះ ផ្លូវធ្វើដំណើរចូលទៅតំបន់នោះពិបាកខ្លាំងណាស់ ។ បច្ចុប្បន្នឃុំមួយនេះនៅមិនទាន់មានទឹកស្អាតប្រើប្រាស់នៅឡើយ ដោយអ្នកភូមិអាស្រ័យលើទឹកអណ្តូងស្នប់ អណ្តូងជីក នឹងទឹកអូរឬព្រែក ដែលហូរកាត់ភូមិប៉ុណ្ណោះ ៕
ចែករំលែកព័តមាននេះ