ថៃ ៖ តាមប្រភពព័ត៌មាន Bangkok Post បានឱ្យដឹងថា ភូកេតកំពុងត្រៀមខ្លួនទទួលក្រុមភ្ញៀវទេសចរដំបូងរបស់ខ្លួន ពីប្រទេសចិន ដែលរំពឹងថានឹងមកដល់នៅសប្តាហ៍ក្រោយក្រោមគ្រោងការណ៍ទិដ្ឋាការទេសចរណ៍ពិសេស (STV) ។ នៅក្នុងដំណាក់កាលដំបូងនៃការបើកដំណើរការវិញ ការហោះហើរលើកដំបូងដែលគ្រោងនឹងចុះចតនៅថ្ងៃទី៨ ខែតុលា ត្រូវបានគេរំពឹងថា នឹងដឹកភ្ញៀវទេសចរ ១២០នាក់មកពីក្វាងចូវ។ អ្នកទេសចរ នឹងស្នាក់នៅដាច់ដោយឡែកពីគ្នា សម្រាប់រយៈពេល ១៤ថ្ងៃ ដែលជាផ្នែកមួយនៃវិធានការត្រួតពិនិត្យជំងឺ។
អភិបាលខេត្តភូកេត លោក Narong Woonsiew បាននិយាយកាលពីថ្ងៃអង្គារ៍ថា អាជ្ញាធរពាក់ព័ន្ធទាំងអស់ត្រៀមខ្លួនស្វាគមន៍មន្ទីរពិសោធន៍កូវីដ ដែលផ្គត់ផ្គង់ដោយនាយកដ្ឋានប្រយុទ្ធនឹងជំងឺឆ្លង ដែលត្រូវបានតំឡើងនៅអាកាសយានដ្ឋានភូកេត។ លោកបាននិយាយថា ទីភ្នាក់ងារដែលពាក់ព័ន្ធនឹងជួបប្រជុំនៅថ្ងៃនេះ ដើម្បីហាត់សមរាល់នីតិវិធីដែលរួមមានការធ្វើតេស្តរកកូវីដលើភ្ញៀវទេសចរ។
លោក Thanit Sermkaew ប្រធានមន្ទីរសុខាភិបាលខេត្តបានមានប្រសាសន៍ថា ប្រព័ន្ធសុខភាពសាធារណៈបានត្រៀមរួចរាល់ដោយមានបន្ទប់ចំនួន ១,២២២ពីសណ្ឋាគារចំនួន ៩ ដែលបានឆ្លងកាត់ការត្រួតពិនិត្យ និងបានជ្រើសរើសជាកន្លែងសម្រាប់ដាក់ភ្ញៀវទេសចរ។ លោកបានមានប្រសាសន៍ថា សណ្ឋាគារសរុបចំនួន ៧៣ ដែលមានបន្ទប់ចំនួនជាង ៥,៨០០ ត្រូវបានគេចាត់ទុកថា ជាកន្លែងដាក់ដាច់ដោយឡែក។
លោកបាននិយាយថា បន្ទប់ប្រហែល ៥,០០០ នឹងត្រូវការសម្រាប់ភ្ញៀវទេសចរតាមគ្រោងការណ៍ STV ដែលចំនួនភ្ញៀវទេសចរមានកំណត់ ១០០នាក់ក្នុងជើងហោះហើរ ដែលមិនមានច្រើនជាង ៣ជើងក្នុងមួយសប្តាហ៍។
លោកបាននិយាយថា ផ្អែកលើដំណើរការនៃការត្រួតពិនិត្យកូវីដ ក្នុងខេត្តក្រសួងការបរទេស និងក្រុមហ៊ុនអាកាសចរណ៍នានា ត្រូវផ្តល់ព័ត៌មានអំពីភ្ញៀវទេសចរមុនពេលពួកគេមកដល់។ អ្នកដំណើរដែលមិនបានឆ្លងកាត់ការត្រួតពិនិត្យសុខភាព ហើយត្រូវបានចាត់ថ្នាក់ជាអ្នកជំងឺដែលស្ថិតក្រោមការស៊ើបអង្កេត (PUI) នឹងត្រូវបញ្ជូនទៅមន្ទីរពេទ្យដែលបានចាត់តាំង៕ ដកស្រង់ចេញពីវេបសាយ ៖ bangkokpost
ចែករំលែកព័តមាននេះ