ប្រទេសបារាំង និងអ៊ីតាលី ៖ តាមប្រភពព័ត៌មាន Reuters បានឱ្យដឹងថា អាជ្ញាធរបាននិយាយនៅថ្ងៃសៅរ៍នេះថាមនុស្ស២នាក់បានបាត់បង់ជីវិត និង៩នាក់បានបាត់ខ្លួន នៅក្នុងប្រទេសបារាំងនិងអ៊ីតាលី បន្ទាប់ពីព្យុះមួយបានវាយប្រហារតំបន់ព្រំដែននៃប្រទេសទាំងពីរ ដែលធ្វើឱ្យមានភ្លៀងធ្លាក់ខ្លាំងនៅតាមកន្លែងនានា និងបង្កជាទឹកជំនន់ធ្ងន់ៗ ដែលបណ្តាលឱ្យផ្លូវនិងផ្ទះខូចខាត។
ព្យុះដែលមានឈ្មោះថា Alex បានវាយបំផ្លាញភូមិជាច្រើននៅជុំវិញទីក្រុង Nice នៅ Riviera ប្រទេសបារាំង។ អភិបាលក្រុង Nice Christian Christian Estrosi បានហៅវាថា ជាគ្រោះមហន្តរាយទឹកជំនន់ដ៏អាក្រក់បំផុតនៅក្នុងតំបន់នេះ អស់រយៈពេលជាងមួយសតវត្សរ៍ បន្ទាប់ពីហោះហើរលើតំបន់ដែលរងគ្រោះខ្លាំងបំផុតដោយឧទ្ធម្ភាគចក្រ។
លោកបានប្រាប់បណ្តាញសារព័ត៌មានបារាំង BFM ថា៖ «ផ្លូវថ្នល់និងផ្ទះប្រហែល ១០០ខ្នង ត្រូវបានបំផ្លាញទាំងស្រុង ខណៈដែលខ្លះទៀតត្រូវបានបំផ្លាញខ្លះ»។
នាយករដ្ឋមន្ត្រីបារាំង លោក Jean Castex បានថ្លែងនៅក្នុងសន្និសីទសារព័ត៌មានបន្ទាប់ពីបានចុះទៅដល់តំបន់រងគ្រោះថា៖ «ខ្ញុំមានការភ្ញាក់ផ្អើលជាខ្លាំងចំពោះអ្វីដែលខ្ញុំបានឃើញនៅថ្ងៃនេះ។ ចំណែកចំនួនអ្នកបាត់បង់ជីវិតអាចនឹងកើនឡើង»។
យ៉ាងហោចណាស់មានមនុស្ស ៨នាក់បានបាត់ខ្លួននៅក្នុងប្រទេសបារាំង។ ទាំងនេះរួមបញ្ចូលទាំងអ្នកពន្លត់អគ្គីភ័យ២នាក់ ដែលរថយន្តរបស់ពួកគេត្រូវបានទឹកទន្លេហូរយកទៅបាត់ យោងទៅតាមសាក្សីក្នុងស្រុកដែលបានដកស្រង់សម្តីដោយប្រព័ន្ធផ្សព្វផ្សាយបារាំងជាច្រើន។
រូបភាពទូរទស្សន៍ពីប្រទេសទាំងពីរ បានបង្ហាញថា ផ្លូវថ្នល់និងស្ពានជាច្រើនត្រូវបានទឹកហូរជន់លិចហើយទឹកទន្លេជាច្រើនត្រូវបានគេរាយការណ៍ថា បានបាក់ច្រាំង។
នៅក្នុងប្រទេសអ៊ីតាលីយ៉ាងហោចណាស់មានមនុស្ស២នាក់បានបាត់បង់ជីវិត ដែលម្នាក់ជាអ្នកពន្លត់អគ្គីភ័យម្នាក់ ដោយបានរងរបួសដោយដើមឈើរលំ និងបុរសម្នាក់ទៀតអាយុ ៣០ឆ្នាំ ដែលរថយន្តរបស់គាត់ត្រូវបានទឹកហូរចូលទៅក្នុងទឹកទន្លេ បន្ទាប់ពីផ្លូវមួយបានដាច់។
ប្រធានប្រចាំតំបន់នៃតំបន់ Piedmont លោក Alberto Cirio បានអំពាវនាវឱ្យរដ្ឋាភិបាលប្រកាសអាសន្ន៕ ដកស្រង់ចេញពីវេបសាយ ៖ reuters
ចែករំលែកព័តមាននេះ