ខេត្តប៉ៃលិន ៖ ប្រជាពលរដ្ឋជាច្រើននាក់ រស់នៅក្រុងប៉ៃលិន កំពុងតែមមាញឹកក្នុងការប្រមូលផលដំណាំផ្លែតាង៉ែន ហៅមៀនប៉ៃលិន ខណៈតម្រូវការទីផ្សារហាក់ដូចជាធ្លាក់ចុះ ។ កាល ពីមុន…
ខេត្តប៉ៃលិន ៖ ប្រជាពលរដ្ឋជាច្រើននាក់ រស់នៅក្រុងប៉ៃលិន កំពុងតែមមាញឹកក្នុងការប្រមូលផលដំណាំផ្លែតាង៉ែន ហៅមៀនប៉ៃលិន ខណៈតម្រូវការទីផ្សារហាក់ដូចជាធ្លាក់ចុះ ។ កាល ពីមុន ឈ្មួញថៃចូលមកទិញដល់ក្រុងប៉ៃលិនក្នុងតម្លៃខ្ពស់ តែរយៈពេល២-៣ឆ្នាំកន្លងទៅនេះ តម្លៃតាង៉ែនហាក់ដូចជាធ្លាក់ចុះព្រោះតែប្រជាពលរដ្ឋនាំគ្នាសម្រុកដាំកាន់តែច្រើនឡើងៗ ស្ទើរគ្រប់គ្នា ។
ជាក់ស្តែងនៅក្នុងចម្ការមួយកន្លែង ស្ថិតនៅក្នុងភូមិដីក្រហម សង្កាត់អូរតាវ៉ៅ ក្រុងប៉ៃលិន ម្ចាស់ចម្ការឈ្មោះ អ៊ុន ស្រង់ ភេទស្រី អាយុ៦០ឆ្នាំ រស់នៅភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន បានដាំតាង៉ែនជាង៧០០ដើមដោយដាក់អ័រម៉ូនឱ្យផ្លែប្រមូលផលជាបណ្តើរៗ និងទុកដាក់អ័រម៉ូនឱ្យផ្លែនៅខែចូលឆ្នាំចិនខាងមុខមួយចំនួនទៀត ។ បើតាមអ្នកចាំចម្ការម្នាក់ ឈ្មោះ ធុច ភេទស្រី អាយុ៦០ឆ្នាំ បានឱ្យដឹងថា ដំណាំតាង៉ែននៅក្នុងចម្ការនេះ អាចបេះផ្លែលក់បានក្នុង១គីឡូក្រាមចាប់ពី៤ទៅ៥ពាន់រៀល ដោយមានអតិថិជនចូលមកទិញតាំងពីខេត្តប៉ៃលិន, បាត់ដំបង, ពោធិ៍សាត់ និងរហូតដល់រាជធានីភ្នំពេញផងដែរ ។ គាត់បន្តថា ថៅកែបានដាំតាង៉ែនជាង៧០០ដើមដោយបានដាក់អ័រម៉ូនឱ្យផ្លែពេលនេះជាង៤០០ដើម ហើយទុកសម្រាប់ឱ្យផ្លែនៅរដូវចូលឆ្នាំចិនខាងមុខមួយចំនួនទៀត ។
គាត់បានបញ្ជាក់ទៀតថា ការដាំតាង៉ែននេះ មានរយៈពេលចាប់ពី៣ទៅ៤ឆ្នាំនៅលើដីដែលមិនជាំទឹក ដោយដាំចន្លោះពី១ដើមទៅ១ដើម ចម្ងាយពីគ្នាប្រវែង៧ទៅ៨ម៉ែត្រ ។ នៅពេលដាក់ឱ្យផ្លែ ត្រូវការថែទាំស្រោចទឹក២ទៅ៣ថ្ងៃម្តង បើពុំដូច្នោះទេមិនមានផ្លែល្អនោះឡើយ ។ លើសពីនេះ នៅក្នុងខេត្តប៉ៃលិន ក្រៅពីដាំពោត និងដំឡូងមី ប្រជាពលរដ្ឋបានងាកទៅដាំដំណាំផ្សេងៗជាច្រើនដូចជា ទំពាំងបារាំង ទុរេន សាវម៉ាវ ត្រឡាច ល្ពៅ ល្ហុង ជាពិសេសតាង៉ែននេះតែម្តង តែបញ្ហាទីផ្សារអាស្រ័យទៅលើឈ្មួញជាអ្នកកំណត់ដដែល ។ ដូច្នេះហើយពេលប្រមូលផលម្តងៗ ពួកគាត់តែងព្រួយបារម្ភយ៉ាងខ្លាំងចំពោះតម្លៃដែលមានការធ្លាក់ចុះ ព្រោះជួនកាលមិនរួចថ្លៃឈ្នួលដាំ ឬឈ្នួលកម្មករដែលធ្វើការនៅក្នុងចម្ការនោះផង ធ្វើឱ្យប្រជាពលរដ្ឋមួយចំនួនបោះបង់ការដាំដុះ ដោយលក់ចម្ការខ្ទេចខ្ទី ដើម្បីយកប្រាក់សងបំណុលអង្គការ និងធនាគារ ៕
ចែករំលែកព័តមាននេះ