ខេត្តបន្ទាយមានជ័យ ៖ បន្ទាប់ពីប្រមុខរាជរដ្ឋាភិបាលចេញអនុក្រឹត្យផ្ទេរភារកិច្ច និងតែតាំងមន្ត្រីរាជការស្រុកក្រុងក្នុងខេត្តបន្ទាយមានជ័យ កាលពីថ្ងៃទី០៦ ខែវិច្ឆិកា ឆ្នាំ២០១៧ នៅព្រឹកថ្ងៃទី១១ ខែធ្នូ ឆ្នាំ២០១៧ នេះ នៅសាលាក្រុងប៉ោយប៉ែត មានការប្រកាសចូលកាន់មុខដំណែងជាអភិបាលក្រុងប៉ោយប៉ែត របស់លោក សាន ស៊ានហូ ជំនួសលោក ង៉ោ ម៉េងជ្រួន ដែលត្រូវបានរាជរដ្ឋាភិបាលដំឡើងជាអភិបាលរងខេត្តបន្ទាយមានជ័យ ។ ពិធីនេះធ្វើឡើងក្រោមអធិបតីភាពលោក សួន បវរ អភិបាល នៃគណៈអភិបាលខេត្តបន្ទាយមានជ័យ សមាជិកព្រឹទ្ធសភា និងរដ្ឋសភា ព្រមទាំងមន្ត្រី និងសមត្ថកិច្ចមកពីមន្ទីរ និងអង្គភាពពាក់ព័ន្ធក្នុងខេត្ត និងក្រុងប៉ោយប៉ែត ក្នុងនោះក៏មានការចូលរួមពីលោក សា វ៉ាន់នីតអាយុធ្យា អភិបាល នៃគណៈអភិបាលខេត្តស្រះកែវ អមដោយមន្ត្រីសមត្ថកិច្ចពាក់ព័ន្ធប្រចាំនៅច្រកទ្វារអន្តរជាតិខ្លងលឹក ស្រុកអារញ្ញ ជាច្រើននាក់ផងដែរ ។
ពិធីប្រកាសចូលកាន់មុខតំណែងនេះ ធ្វើឡើងនៅក្នុងបរិវេណសាលាក្រុងប៉ោយប៉ែត ភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ។ គួរបញ្ជាក់ថា យោងអនុក្រឹត្យស្តីពីការផ្ទេរភារកិច្ចតែងតាំងមន្ត្រីរាជការរបស់ប្រមុខរាជរដ្ឋាភិបាលនេះ គឺធ្វើឡើងជាច្រើនស្រុកក្រុងដូចជាក្រុងសិរីសោភ័ណ ស្រុកព្រះនេត្រព្រះ ស្រុកអូរជ្រៅ ស្រុកស្វាយចេក និងស្រុកថ្មពួក ហើយកម្មវិធីប្រកាសចូលកាន់តំណែងនេះ និងធ្វើឡើងជាបន្តបន្ទាប់នាពេលខាងមុខនេះ ៕
ចែករំលែកព័តមាននេះ