ខេត្តក្រចេះ ៖ បើទោះបីជារយៈពេលប៉ុន្មានថ្ងៃចុងក្រោយនេះស្ថានភាពភ្លៀងបានបង្អុរធ្លាក់ច្រើនបន្តិចយ៉ាងណាក្តីក៏ប្រជាកសិកលើកឡើងថា មិនមិនបានស្រោចស្រពគ្រប់ទីកន្លែងសម្រាប់ការដាំដុះនោះទេ ដោយពួកគាត់សម្តែងនូវក្តីបារម្ភថា ទិន្នផលស្រូវវស្សារបស់ពួកគាត់ នឹងធ្លាក់ចុះនៅពេលដែលឆ្នាំនេះគ្រោះរាំងស្ងួតបានអូសបន្លាយពេលយូរនាដើមឆ្នាំបែបនេះ។
ក្រោយពីគ្រោះរាំងស្ងួតនាដើមរដូវវស្សាដែលមន្ត្រីជំនាញចាត់ទុកថា ជាកូនរដូវប្រាំងនាដើមរដូវនេះបានអូសបន្លាយពេលយូរក៏កំពុងតែបង្កឲ្យមហន្តរាយធ្ងន់ធ្ងរដល់ដំណាំកសិកម្មគ្រប់ប្រភេទដោយត្រូវស្វិតក្រៀមស្រពោនងាប់ជាបន្តបន្ទាប់ដោយសារកង្វះទឹក។
ដីស្រែដែលបានសាបព្រោះសំណាបរួចរាល់ជាច្រើនកន្លែងក្នុងស្រុកចិត្របុរី និងស្រុកព្រែកប្រសព្វ ត្រូវបានស្ងួតបែកប្រេះក្រហែង ចំណែកឯសន្ទូង និងសំណាបក៏ត្រូវក្រហមក្រៀមងាប់ជាហូរហែ ស្របពេលដែលប្រឡាយទឹក អូរ និងស្រះទឹកក៏ត្រូវរីងហួតស្ទើរដល់បាតដី បន្ទាប់ពីប្រជាកសិករនាំគ្នាបូមបញ្ជូលទឹកក្នុងស្រែ តែផ្គត់ផ្គង់មិនគ្រប់គ្រាន់ ដូចតាមតម្រូវការនោះទេ។
ពលរដ្ឋជាប្រជាកសិករនៅស្រុកចិត្របុរី ក៏ដូចជានៅក្នុងស្រុកព្រែកប្រសព្វដែលចាប់យកនូវរបរកសិកកម្មជាប្រភពចំណូលចម្បងនោះបានសម្តែងក្តីបារកម្ភថា ទិន្នផលស្រូវ និងដាំណាំកសិកម្មរបស់ពួគគាត់នៅឆ្នាំនេះនឹងអាចបាត់ទិន្នផលដល់ទៅជាង៥០% ពីឆ្នាំមុន ដោយសារតែឆ្នាំនេះគ្មានទឹកសម្រាប់ផ្គត់ផ្គង់។
ពួកគាត់បានរៀបរាប់ប្រាប់ថា ជារៀងរាល់ឆ្នាំក្នុងខែនេះ ការដកស្ទូងរបស់ពួកគាត់ត្រូវបានបញ្ចប់រួចរាល់ តែសម្រាប់ឆ្នាំនេះកុំថាតែសាបព្រោះ សូម្បីតែភ្ជួររាស់ដាស់ដី ក៏មានខ្លះនៅមិនទាន់បានធ្វើនៅឡើយ ដោយសារតែដីប្រេះក្រហែងគ្មានទឹក។
ស្របគ្នានេះដែរក៏មានប្រជាកសិករមួយចំនួនបានសម្រេចធ្វើស្រូវពង្រោះចោលទៅវិញដោយសារគ្មានទឹកគ្រប់គ្រាន់។ គ្រោះរាំងស្ងួតដើមរដូវនេះ គឺពូកគាត់លើកឡើងថា មិនធ្លាប់ជួបប្រទះនោះទេកាលពីមុនមក។ ហើយប្រសិនបើគ្រោះរាំងស្ងួតនៅតែអូសបន្លាយពេលយូរបែបនេះ ឆ្នាំក្រោយពូកគាត់នឹងមិនមានលទ្ឋភាពសម្រាប់ទិញស្រូវពូជ និងជីដាក់ស្រែទៀតនោះទេ។
ជាមួយគ្នានេះពួកគាត់បានស្នើឲ្យអាជ្ញាធរផ្តល់ជាប្រឡាយទឹកមេធំៗនៅតាមតំបន់គោលដៅដាំដុះរបស់ពួកគាត់ ដើម្បីឲ្យពួកគាត់ងាយស្រួលក្នុងការបង្កបង្កើនផល បើទោះបីជាជួបប្រទះនូវកូនរដូវប្រាំងរយៈពេលយូរបែបណាក្តី។
តាមការបញ្ជាក់ឲ្យដឹងនៅថ្ងៃទី១០ កក្កដា នេះ ប្រធានការិយាល័យក្សេត្រសាស្ត្រនៃមន្ទីរកសិកម្មខេត្តលោក សំ សំអាង បានអះអាងថា គ្រោះរាំងស្ងួតឬកូនរដូវប្រាំងដើមឆ្នាំនេះមិនទាន់បង្កឲ្យមានការខូចខាតធ្ងន់ធ្ងរដល់ដំណាំកសិកម្មរបស់ប្រជាពលរដ្ឋនោះទេ ដោយគ្រាន់តែមានចំនួនតិចតួចបានរងការប៉ះពាល តែក៏បានធូរស្រាលវិញក្រោយពីមានភ្លៀងធ្លាក់ជោកជាំបន្តិចរួចមក។
លោកប្រធានការិយាល័យបានអះអាងទៀតថា មន្ទីរជំនាញបានចាត់ឲ្យមានមន្ត្រីចុះទៅដល់មូលដ្ឋានគោលដៅងាយរងគ្រោះជាប់ជាប្រចាំ ដើម្បីត្រួតពិនិត្យ និងវាយតម្លៃលើការខូចខាត ហើយមន្ទីរជំនាញ និងរក
លទ្ឋភាពជួយស្តារឡើងវិញឲ្យទៅពួកគាត់នៅពេលដែលពួកគាត់ជួបការខូចខាត ទាំងការផ្តល់គ្រាប់ពូជ និងផ្តល់ប្រេងសម្រាប់បូមទឹក៕
ចែករំលែកព័តមាននេះ