ខេត្តសៀមរាប ៖ ដំណាំម្រុំនឹងអាចជួយលើកកម្ពស់ដល់ជីវភាព អ្នកភូមិរុនតាឯក ឱ្យកាន់តែប្រសើរឡើងវិញមួយកម្រិតទៀត ដោយខាងអាជ្ញាធរជាតិអប្សរា បានដាក់ចេញនូវគម្រោងជាច្រើន ដែលគម្រោងទាំងនោះបានផ្តោតសំខាន់ទៅលើផ្នែកកសិកម្មដំណាំដាំដុះ ការចិញ្ចឹមសត្វជាអាទិភាព ដើម្បីជួយលើកស្ទួយជីវភាពរស់នៅប្រជាពលរដ្ឋដែលនៅក្នុងភូមិធម្មជាតិរុនតាឯក ឃុំរុនតាឯក ស្រុកបន្ទាយស្រី ខេត្តសៀមរាប។
លោក ម៉ី ម៉ារ៉ាឌី ទីប្រឹក្សាអាជ្ញាធរជាតិអប្សរា និងជាប្រធានគម្រោងអភិវឌ្ឍន៍ភូមិធម្មជាតិរុនតាឯកបានលើកឡើងកាលពីថ្ងៃទី០៤ ខែតុលា ឆ្នាំ២០១៦ ថា ចាប់ពីកកើតភូមិធម្មជាតិរុនតាឯកនេះមក អាជ្ញាធរជាតិអប្សរាបានយកចិត្តទុកដាក់ខ្លាំងទាំងវិស័យសេដ្ឋកិច្ច វិស័យសុខាភិបាល វិស័យអប់រំ វិស័យកសិកម្ម វិស័យបរិស្ថាន និងជាពិសេសគឺវិស័យសាសនាផងដែរ។
លោកបានបន្តថា ដើម្បីលើកកម្ពស់ជីវភាពអ្នកភូមិឱ្យកាន់តែប្រសើរនោះ អាជ្ញាធរជាតិអប្សរាបានដាក់ចេញនូវគម្រោងថ្មីមួយទៀត គឺគម្រោងដាំម្រុំ ព្រោះដើមម្រុំជាប្រភេទរុក្ខជាតិធម្មជាតិម្យ៉ាងដែលមានសក្ដានុពលនៅលើទីផ្សារ ហើយក៏អាចបង្កើនចំណូលបន្ថែមឱ្យកាន់តែច្រើនជូនដល់ប្រជាពលរដ្ឋនៅភូមិធម្មជាតិរុនតាឯក។
ចំណែកលោក អ៊ឹង តុងអៀង ជាប្រធានក្រុមហ៊ុន SPLE បានលើកឡើងថា ក្រុមហ៊ុនរបស់លោកនឹងសហការជាមួយអាជ្ញាធរជាតិអប្សរាដើម្បីផ្តល់បច្ចេកទេស ផ្តល់ពូជម្រុំ ដល់ប្រជាកសិករនៅក្នុងភូមិធម្មជាតិរុនតាឯកជាងនេះទៀតនៅពេលដែលប្រជាកសិករទទួលបានផល ក្រុមហ៊ុនរបស់លោកនឹងទទួលទិញយកទាំងអស់ក្នុងតម្លៃសមរម្យស្មើនឹងតម្លៃទីផ្សារ។
លោក តុងអៀង បានបន្តថា ដើម្បីឱ្យការដាំដុះម្រុំទទួលបានផលល្អ និងគុណភាពខ្ពស់ត្រូវតាមស្តង់ដារទីផ្សារនោះ ក្រុមហ៊ុនរបស់លោកបានផ្តល់បច្ចេកទេសក្នុងការដាំដុះ ជាដំបូងគឺក្រុមការងារបច្ចេកទេសរបស់លោក ចុះទៅដល់ទីតាំងផ្ទាល់ ដើម្បីតាមដានស្ថានភាពដី ជាពិសេសគឺដីដែលមិនលិចទឹក ដីមានប្រភពទឹកគ្រប់គ្រាន់ បម្រែបម្រួលអាកាសធាតុ របៀបនៃការដាំដុះ របៀបនៃការកាត់ក្រីមែក និងក្រៀវដើម។ ដំបូងក្រុមហ៊ុនរបស់លោកបានជ្រើសរើសគ្រួសារដែលស្ម័គ្រចិត្តចំនួន ៨ គ្រួសារសម្រាប់ការដាំដុះលើផ្ទៃដីចំនួន ១ហិកតាជាង ដែល ៦គ្រួសារ ផ្នែកខាងគម្រោងម្រុំជូនផ្ទៃដីដល់ពួកគាត់ ៥០×៥០ ម៉ែត្រ ប្រហែលជា២៥០០ ម៉ែត្រការ៉េ ក្នុងមួយឆ្នាំពួកគាត់អាចទទួលចំណូល ២២០០ ដុល្លារគិតជាមធ្យម។
ចំណែករឿងពូជក្រុមហ៊ុននឹងមានការចែកជូនដល់ពួកគាត់ដោយឥតគិតថ្លៃដោយក្នុងមួយគ្រួសារទទួលបានពូជ ១ គីឡូក្រាមផងដែរ។ លោក តុងអៀង បានបន្ថែមទៀតថា លោកជឿជាក់ថាប្រជាកសិករនឹងទទួលបានអត្ថប្រយោជន៍ច្រើន ដូចជាការកើនឡើងនូវចំណូលជាប្រចាំថ្ងៃបន្ថែមទៀត សក្ដិសមនឹងទំហំផ្ទៃដីដែលពួកគាត់ដាំដុះ ពិសេសជាងនេះទៀតនោះ គឺដើមម្រុំជាប្រភេទដើមរុក្ខជាតិម្យ៉ាង ដែលសារធាតុចិញ្ចឹមខ្ពស់ ដែលអាចបរិភោគស្លឹករបស់វាជាពិសេស ត្រួយខ្ចី គ្រាប់ខ្ចី ស្លឹក និងប្ញសរបស់វាផងដែរ។
ស្លឹករបស់ម្រុំអាចបញ្ចុះទម្ងន់ និងសំបូរទៅដោយជាតិអំបិលខនិជ ជាតិដែក និងវីតាមីនB។ ម្រុំអាចជួយផ្តល់អត្ថប្រយោជន៍ដល់យើងជាច្រើន នៅពេលដែលដើមរបស់វាមានផ្លែនៅខ្ចី ដែលស្លឹកម្រុំមានរសជាតិយ៉ាងឆ្ងាញ់ដូចបន្លែដែរ ហើយនឹងផ្នែកជាច្រើនទៀតរបស់ម្រុំត្រូវបានគេយកទៅធ្វើជាថ្នាំព្យាបាលជម្ងឺ ដែលមានគុណតំលៃបំផុត ដូចជា ស្លឹក ប្ញស គ្រាប់ ផ្កាជាដើម៕
ចែករំលែកព័តមាននេះ