ខេត្តកំពង់ឆ្នាំង៖ ផ្ទះចំនួន១៥ខ្នងបានរងការខូតខាតធ្ងន់និងស្រាល ក្នុងនោះផ្ទះចំនួន២ខ្នងដួលរាបដល់ដី ដោយគ្រោះធម្មជាតិ មានភ្លៀង និងខ្យល់កន្ទ្រាក់បានកើតឡើងនៅវេលាម៉ោង៥និង៤៥នាទីល្ងាចថ្ងៃទី៦ ខែឧសភា ឆ្នាំ២០១៨ ។ ហេតុការណ៍នេះបានកើតឡើង នៅស្រុករលាប្អៀរ និងក្នុងក្រុងកំពង់ឆ្នាំង ។
អាជ្ញាធរសង្កាត់ខ្សាម ក្រុងកំពង់ឆ្នាំង បានអោយដឹងថា ភ្លៀងមួយមេធំលាយឡំជាមួយខ្យល់ព្យុះកន្ទ្រាក់ នៅល្ងាចថ្ងៃទី៦ ខែឧសភា ឆ្នាំ២០១៨ បានធ្វើអោយផ្ទះប្រជាពលរដ្ឋនៅក្នុង សង្កាត់ខ្សាម ចំនួន៧ខ្នង បានរងការខូចខាតស្រាល គឺរបើកដំបូល និងជញ្ជាំង ប៉ុន្តែមិនបានធ្វើអោយ្រជាពលរដ្ឋណាមួយរងរបួសឡើយ ។ នៅព្រឹកថ្ងៃទី៧ ខែឧសភា នេះ អាជ្ញាធរសង្កាត់ខ្សាម បានធ្វើរបាយការណ៍ជូនលោកអភិបាលក្រុងកំពង់ឆ្នាំងរួចហើយ ដើម្បីស្នើសុំដល់សាខាកាកបាទក្រហមក្រុង និងខេត្ត ជួយផ្តល់អំណោយសង្គ្រោះបន្ទាន់ដល់ជនរងគ្រោះ ខាងលើនេះ ។
ដោយឡែក នៅក្នុងភូមិអូររោង ឃុំជ្រៃបាក់ ស្រុករលាប្អៀរវិញ លោក ជឹម សារុំ មេភូមិអូររោង បានអោយដឹងថា ភ្លៀងនិងខ្យល់ខាងលើនេះបានបោកបក់ចំកណ្តាលភូមិអូររោង បណ្តាលអោយផ្ទះប្រជាពលរដ្ឋចំនួន៨ខ្នង រងការខូចខាត ក្នុងនោះចំនួន៦ខ្នង បានខូចខាតស្រាល របើកដំបូល និងជញ្ជាំង ចំណែក២ខ្នងបានខូចខាតធ្ងន់ គឺរលំដួលរាបដល់ដីតែម្តង ជាមួយគ្នានោះដើមឈើក្នុងភូមិចំនួន២៥ដើម និងបង្គោលភ្លើងថ្ម១ដើម បានរលំដួល តែពុំបណ្តាលឱ្យប្រជាពលរដ្ឋណាម្នាក់រងរបួសឡើយ ។
ផ្ទះប្រជាពលរដ្ឋខូចខាតធ្ងន់ជាងគេគឺទី១-ឈ្មោះ នៅ ជួប អាយុ៣៥ឆ្នាំ ជាបុរសពោះម៉ាយ មានមុខរបរទិញ លក់ស្រូវ និងលក់ជី ផ្ទះទំហំ១២,៥០ម៉ែត្រគុណនឹង១៧,៥០ម៉ែត្រ ធ្វើពីសង្ក័សីផ្ទាល់ដី ត្រូវបានខ្យល់ព្យុះបោកបក់រលំប៉ើងជាង១០ម៉ែត្រ បណ្តាលឱ្យរងការខូចខាតទាំងស្រុង មិនអាចជួលជុលវិញបានឡើយ និងបានបាត់បង់ប្រាក់ចំនួន៥០ម៉ឺនរៀល ដោយសារខ្យល់កួចប៉ើងបាត់រកមិនឃើញ ។ លោក នៅ ជួប បានអោយដឹងថា លោកបានខ្ចីលុយពីធនាគារមួយនៅក្នុងក្រុងកំពង់ឆ្នាំងចំនួន២៥.០០០ដុល្លារ ដើម្បីបង្កើតមុខរបរទិញស្រូវ និងលក់ជី ហើយនិងយកមកសាងសង់ផ្ទះមួយនេះអស់ ៨.០០០ដុល្លា ដោយទើបតែធ្វើហើយ និងចូលមករស់នៅ មុនចូលឆ្នាំខ្មែរ បានជាង១ខែ ឥឡូវត្រូវខូចខាតអស់ទៅហើយ។ ទី២-ផ្ទះសង្ក័សីមួយខ្នងទៀតទំហំ៥ម៉ែត្រគុណនិង៧ម៉ែត្រ ម្ចាស់ឈ្មោះ សន នី អាយុ៤៥ឆ្នាំ មានសមាជិកក្នុងគ្រួសារ៧នាក់ ត្រូវបានខ្យល់បោកបក់ដួលរាបដល់ដីខូចខាតទាំងស្រុង តែពេលរលំផ្ទះម្ចាស់មិនបាននៅលើផ្ទះនោះទេ ៕
ចែករំលែកព័តមាននេះ