ថៃ ៖ តាមប្រភពព័ត៌មាន Bangkok Post បានឱ្យដឹងថា ក្រុមអាវលឿងនៅឯការជួបជុំនានា ត្រូវបានគេឃើញនៅទូទាំងប្រទេសកាលពីម្សិលមិញ នៅក្នុងអ្វីដែលត្រូវបានគេរាយការណ៍ថា ជាចលនានិមិត្តរូបដើម្បីការពាររាជាធិបតេយ្យ…
ថៃ ៖ តាមប្រភពព័ត៌មាន Bangkok Post បានឱ្យដឹងថា ក្រុមអាវលឿងនៅឯការជួបជុំនានា ត្រូវបានគេឃើញនៅទូទាំងប្រទេសកាលពីម្សិលមិញ នៅក្នុងអ្វីដែលត្រូវបានគេរាយការណ៍ថា ជាចលនានិមិត្តរូបដើម្បីការពាររាជាធិបតេយ្យ ខណៈដែលគណបក្ស Palang Pracharath (PPRP) ដែលកំពុងកាន់អំណាចបានសម្រេចចិត្តអនុញ្ញាតឱ្យសមាជិកសភារបស់ខ្លួនរៀបចំបាតុកម្មបង្ហាញភាពស្មោះត្រង់របស់ពួកគេចំពោះស្ថាប័នរាជានិយម។
ចលនានេះមានគោលបំណងប្រឆាំងនឹងក្រុមបាតុករគាំទ្រលទ្ធិប្រជាធិបតេយ្យ ដែលការទាមទាររបស់ពួកគេរួមមានការកែទម្រង់រាជាធិបតេយ្យ។ ការជួបជុំគ្នាដែលមានពន្លឺពណ៌លឿង ក៏ត្រូវបានរៀបចំឡើងដើម្បីគាំទ្រដល់លោកនាយករដ្ឋមន្ត្រីប្រាយុទ្ធចានអូចា ឆ្លើយតបនឹងការទាមទារផ្សេងទៀតរបស់ក្រុមបាតុករនៅយប់ថ្ងៃពុធ នៅពេលដែលពួកគេបានអំពាវនាវឱ្យលោកនាយករដ្ឋមន្ត្រីចុះចេញពីតំណែងក្នុងរយៈពេល ៣ថ្ងៃ។
ក្រុមអាវលឿងបានប្រមូលផ្តុំគ្នានៅតាមខេត្តជាច្រើនកាលពីម្សិលមិញរួមមានទីក្រុងបាងកក, ឈៀងម៉ៃ, ឡាំប៉ាង, ស៊ូរិន, ខុនខាន, សុងក្លា និងណារ៉ាធីវ៉ាត។
ជាមួយគ្នានេះដែរលោក Sanhaphot Suksimuang អ្នកនាំពាក្យរងរបស់ PPRP បាននិយាយថា គណបក្សបានឈានដល់ដំណោះស្រាយនៅក្នុងកិច្ចប្រជុំពិសេសកាលពីម្សិលមិញ ទាក់ទងនឹងការអនុញ្ញាតឱ្យសមាជិកសភារបស់ខ្លួនដើរតួនាទីក្នុងការការពារស្ថាប័នរាជានិយម ប្រសិនបើពួកគេចង់ បានតាមរយៈសកម្មភាពដែលកំពុងត្រូវបានគេសង្កេតឃើញនៅតាមខេត្តមួយចំនួន។
លោក Sanhaphot មានប្រសាសន៍ថា សកម្មភាពបែបនេះអាចបង្ហាញដល់អ្នកដែលមានទស្សនៈខុសគ្នាថា នៅតែមានមនុស្សដែលស្រឡាញ់និងមានឆន្ទៈការពារស្ថាប័នរាជានិយម។
គួរបញ្ជាក់ផងដែរថា ជំពូក១នៃច្បាប់ បានចែងថា ប្រទេសថៃគឺជាព្រះរាជាណាចក្រមួយដែលមិនអាចបំបែកបាន និងប្រកាន់យករបបដឹកនាំបែបប្រជាធិបតេយ្យមួយ ដែលមានព្រះមហាក្សត្រជាប្រមុខរដ្ឋ៕
ចែករំលែកព័តមាននេះ