រាជធានីភ្នំពេញ ៖ ក្រសួងព័ត៌មានគ្រោងប្រើប្រាស់ប័ណ្ណថ្មី តាមបែបបច្ចេកវិទ្យាទំនើប សម្រាប់អ្នកសារព័ត៌មាន ដើម្បីងាយស្រួលគ្រប់គ្រង និងប្រមូលទិន្នន័យទាំងក្នុងក្របខណ្ឌរដ្ឋ និងអង្គភាពព័ត៌មានឯកជន ឲ្យបានត្រឹមត្រូវទៅតាមវិជ្ជាជិវៈរបស់ខ្លួន ។ នេះបើតាមការបញ្ជាក់ឲ្យដឹងពីទីភ្នាក់ងារសារព័ត៌មានជាតិកម្ពុជា នៃអគ្គនាយកដ្ឋានព័ត៌មាន និងសោតទស្សន៍ នៃក្រសួងព័ត៌មាន កាលពីព្រឹកថ្ងៃទី០៨ ខែកមរា ឆ្នាំ២០១៨ ។
លោក ផុស សុវណ្ណ អគ្គនាយក នៃអគ្គនាយកដ្ឋានព័ត៌មាន និងសោតទស្សន៍ នៃក្រសួងព័ត៌មានបានលើកឡើងឲ្យដឹងនៅព្រឹកថ្ងៃទី០៨ ខែកមរា ឆ្នាំ២០១៨ នេះថា ការប្រើប្រាស់ប័ណ្ណព័ត៌មានគំរូថ្មីនេះ នឹងផ្ដល់ភាពងាយស្រួលដល់អ្នកសារព័ត៌មាន ក្នុងការចូលទៅយកព័ត៌មានក្នុងស្ថាបននានា ។
លោកបន្តឲ្យដឹងទៀតថា ប័ណ្ណថ្មីនេះ នឹងធានាសន្តិសុខកម្រិតខ្ពស់ និងអាចសម្គាល់អត្តសញ្ញាណរបស់អ្នកសារព័ត៌មាន មកពីអង្គភាពណាបានពិតប្រាកដជាក់លាក់ ។ អគ្គនាយក នៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មានរូបនេះបានបញ្ជាក់ថា លក្ខណពិសេសរបស់ប័ណ្ណថ្មីនេះ គឺមាន Chip ភ្ជាប់ QR Code ដែលអាចឲ្យមន្ត្រីសមត្ថកិច្ចត្រួតពិនិត្យបានភ្លាមៗ ក្នុងករណីសង្ស័យថា មានអ្នកកាន់ប័ណ្ណពិតប្រាកដ ឬក្លែងបន្លំ ។
ជាមួយគ្នានេះ ក្រសួងព័ត៌មាន ចង់ឲ្យប័ណ្ណថ្មីបែបបច្ចេកវិទ្យានេះ អាចភ្ជាប់កិច្ចសហប្រតិបត្តិការណ៍ជាមួយអង្គភាពផ្សេងៗ ដូចជាហាងកាហ្វេ ឬភោជនីយដ្ឋាន ដែលអាចបញ្ចុះតម្លៃផ្សេងៗ ដល់អ្នកសារព័ត៌មាន ។
លោក ផុស សុវណ្ណ បន្តថា ការប្រើប្រាស់ប័ណ្ណថ្មីនេះ កាន់តែមានប្រយោជន៍ សម្រាប់កិច្ចសហប្រតិបត្តិការក្រៅប្រទេសដូចជា ប្រទេសឥណ្ឌា ចិន វៀតណាម និងប្រទេសមួយចំនួនទៀត ដែលក្រសួងព័ត៌មានធ្លាប់ចុះអនុស្សរណៈយោគយល់គ្នា ៕
ចែករំលែកព័តមាននេះ