តាមប្រភពព័ត៌មាន Reuters បានឱ្យដឹងថា អ្នកស្រាវជ្រាវបាននិយាយថា ការពាក់ម៉ាស់ជាធម្មតា គឺមិនសូវជាស្រួលទេ តែវាមិនបានធ្វើឱ្យមានការរាំងស្ទះដល់ការដកយកអុកស៊ីសែនទេ បើទោះបីជាប្រើប្រាស់លើអ្នកដែលមានជំងឺសួតធ្ងន់ធ្ងរក៏ដោយ។
ពួកគេបានសាកល្បងប្រសិទ្ធភាពនៃការពាក់ម៉ាស់ពេទ្យធម្មតា លើការផ្លាស់ប្តូរឧស្ម័ន ដែលជាដំណើរការដែលរាងកាយដកយកអុកស៊ីសែន ហើយបញ្ចេញទៅវិញនូវកាបូនឌីអុកស៊ីត នៅលើគ្រូពេទ្យដែលមានសុខភាពល្អនិងទាហានជើងចាស់ចំនួន ១៥នាក់ ដែលមានសុខភាពសួតខ្សោយតាមរយៈការដើររយៈពេល ៦នាទី។
កម្រិតអុកស៊ីសែន និងកាបូនឌីអុកស៊ីតនៅក្នុងឈាមត្រូវបានវាស់មុន និងក្រោយពេលធ្វើតេស្តដើរ។ ជាលទ្ធផល ទាំងវេជ្ជបណ្ឌិតដែលមានសុខភាពល្អនិងអ្នកដែលមានសួតខ្សោយ មិនបានបង្ហាញពីការផ្លាស់ប្តូរដ៏ធំណាមួយ ក្នុងកម្រិតអុកស៊ីសែននោះទេ បន្ទាប់ពីការធ្វើតេស្តដើររហូតដល់ ៣០នាទីក្រោយមក។
អ្នកស្រាវជ្រាវបានរាយការណ៍នៅថ្ងៃសុក្រក្នុងអត្ថបទវេជ្ជសាស្ត្រ Thorax ថា ភាពមិនស្រណុកក្នុងខ្លួននៅពេលពាក់ម៉ាស់គឺមិនធ្វើឱ្យប៉ះពាល់ដល់កម្រិតអុកស៊ីសែនទេ។ ផ្ទុយទៅវិញ ការពាក់ម៉ាស់អាចបណ្តាលឱ្យមានអារម្មណ៍មិនស្រួល ដោយធ្វើឱ្យសរសៃប្រសាទនៅនឹងស្បែកមុខមានការរំខាន អាចធ្វើឱ្យខ្យល់ក្តៅក្នុងការដកដង្ហើម និង មានអារម្មណ៍មិនស្រលះ។ អ្នកស្រាវជ្រាវបាននិយាយថា ភាពមិនស្រួលទាំងនេះមិនគួរបង្កការព្រួយបារម្ភពីសុវត្ថិភាពនោះទេ ព្រោះតែវាជួយដល់ការកាត់បន្ថយការឆ្លងជំងឺកូវីដ៕
ចែករំលែកព័តមាននេះ